Ադամի մեղքը

«Ադամի մեղքը», հայ գրող Արտուշ Դանիելի Սահակյանի բանաստեղծությունների հավաքածուն։ Հրատարակվել է Երևանում՝ 1991 թվականին։ Ժողովածուն բաղկացած է «Հայրեններ», «Հազարից մեկը», «Քնարերգություն», «Խոհեր», «Քառյակներ» և «Պոեմներ» բաժիններից։

Քաղվածքներ «Հայրեններ» բաժնից

Հայրենական

Որ սևաշոր հարս չմնա,

Մայր չսգա որդու համար...

Որ արտերը խաղա ծթան,

Արեգակը ժպտա արդար։

Ով է գտնում...

Երջանկություն նա է գտնում,

Ով հացն արդար է վաստակում։

Քաղվածքներ «Հազարից մեկը» բաժնից

Վերքեր անցյալից

Հարսին տարան դեզում պահին,

Զուգ-զարդարանք հանին հագեն,

Փեսի ձեռքը սուրը տվին,

Թևից քաշին մահուդ չուխեն...

Գել ու գազան հանդն էր վխտում

Այն թոհ ու բոհ դժար տարին,

չորեք կողմից զարկում, տանում

Էլ հորթ ու կով, ուլն ու մաքին։

Քաղվածքներ «Քնարերգություն» բաժնից

Դու Լիլիթն ես

Դու սահում ես, փախչում, կանչում,

Ինձ հույս տալիս լուսավոր,

Երկնավորից չես ամաչում,

Ես՝ Ադամս եմ մեղավոր։

Քաղվածքներ «Խոհեր» բաժնից

Արևին

Այդքան թովչանք ու քո հուրը,

Ու կյանք ծնող քո համբույրը

Տու՛ր աշխարհին, բոլոր մարդկանց։

Քաղվածքներ «Քառյակներ» բաժնից

—Իսկ ես չունեմ մահվան ահը,

Անմահությունն է իմ մահը...

Խիղճդ արա քեզ աստված,

Ինքդ քո մեջ, քե՛զ դատիր...

Քաղվածքներ «Պոեմներ» բաժնից

Ադամի մեղքը

Բայց լսել եմ լեգենդացած

Դարերի զրույցն այս հին,

Որ արգելված մի պտուղով

Եվան խաբվեց, մերկացավ,

Բողբոջ կուրծը մեղքի գինով,

Մեղքի համով քաղցրացավ։

Աղբյուրներ

Արտուշ Սահակյան, «Ադամի մեղքը»։ Բանաստեղծություններ, Արևիկ հրատարակչություն, 1991 թ., ISBN - 5-8077-0496-7։